Ի՞նչ  է  քրիստոնեությունը  և  ինչի՞ն  են հավատում  քրիստոնյաները

Քրիստոնեությունը հավատ է: Քրիստոնյաները հավատում են, որ երկու հազարամյակ առաջ Աստված եկավ երկիր: Նա ծնվեց որպես մարդ, ստացավ Հիսուս անունը: Ապրեց որպես մարդ, քարոզեց, չարչարվեց, խաչվեց, մեռավ, հարություն առավ: Նրա մահն ու հարությունը փոխեցին ամբողջ մարդկության ճակատագիրը: Նրա քարոզները նոր քաղաքակրթության հիմքը դրեցին:

Քրիստոնյաները հավատում են, որ հավիտենական Աստված է աշխարհն արարել, արարել է առանց չարիքի: Մարդուն նույնպես արարել է Աստված, արարել է կատարյալ, առանց մեղքի: Մարդուն Աստված օժտել է լիակատար ազատությամբ: Բայց մարդն օգտվելով իր ազատությունից, դեռևս դրախտում տրվեց սատանայի գայթակղությանը և թույլ տվեց այնպիսի արարք, որ փոխեց մարդկության ճակատագիրը:

Սատանան Աստծո հրեշտակներից մեկն էր, ում սրտում էր ծնվել մեղքը և ով ապստամբել էր Աստծո կամքի դեմ: Մարդը տրվեց սատանայի գայթակղությանը և ինքն էլ խախտեց Աստծո օրենքը: Մարդը մեղք գործեց: Նա ուզեց ինքն էլ դառնալ «Աստծո նման»: Դրա հետևանքով փոխվեց մարդու բնույթը: Մարդը կորցրեց իր անմահ էությունը և դարձավ խոցելի տառապանքների, հիվանդության և մահվան նկատմամբ: Աշխարհ մտավ նախածին մեղքը, որը փոխանցվում է սերնդից սերունդ: Մարդու և Աստծո միջև անդունդ գոյացավ:

Մարդուն ճշմարիտ ուղու վերադարձնելու համար Աստված պետք անձամբ հայտնվեր մարդուն: Հազարամյակներ շարունակ մարդը սպասում էր Փրկչին՝ Աստծո մարմնավորմանը: Նա պետք է մաքրեր աշխարհը չարիքից և ազատեր մարդուն մեղքի ստրկությունից:

Եվ Աստված երկիր ուղարկեց Իր Որդուն` Հիսուսին: Տառապանքներով և խաչի վրա Իր մահով Հիսուսը քավեց ամբողջ մարդկության նախածին մեղքը:  Հիսուսի հարությամբ կյանքը հաղթեց մահվանը: Մահվանը հաղթեց Ինքը՝ Հիսուսը: Հիսուսը մարդուն հաշտեցրեց Աստծո հետ:

Աստված մարդացավ, որպեսզի մարդն Աստվածանա:

Սկսվեց Նոր Ուխտի՝ Սիրո դարաշրջանը. «Նոր պատվիրան եմ տալիս ձեզ, որ սիրեք միմյանց. ինչպես Ես ձեզ սիրեցի, դուք էլ միմյանց սիրեք» (Հովհ. 13:34)։

Քրիստոնյաները գիտեն, որ ոչ ոք չի կարող վաստակել փրկությունն ինքնուրույն՝ բարի գործեր կատարելով: Փրկությունը տրվեց ոչ որպես վարձատրություն բարի գործերի դիմաց: Փրկությունը տրվեց որպես ընծա, որպես շնորհ. «Աստված այնպես սիրեց աշխարհը, որ իր միածին Որդուն տվեց, որպեսզի ով Նրան հավատում է, չկորչի, այլ հավիտենական կյանք ունենա» (Հովհ.3:16): Փրկությանն արժանանալու համար մարդուն անհրաժեշտ է ընդամենը հավատալ Հիսուսի սխրանքին. «Եթե բերանովդ Հիսուսին Տեր դավանես և սրտումդ հավատաս, թէ Աստված նրան հարություն տվեց մեռելներից, կփրկվես» (Հռոմ. 10:9):

Քրիստոնյաները հավատում են Միակ Աստծուն՝ Արաչին, Հորը, միակ Որդուն՝ Փրկչին, Հիսուս Քրիստոսին և Սուրբ Հոգուն՝ Բարեխոսին և Մխիթարիչին: Եվ այս երեքի անունն է ԱՍՏՎԱԾ: